Hringnun July 2009-Thalai Pual

Thalai pual :
Saruakin Mallika Sherawat!
Hei chu Bollywood mai a ni lo, Hollywood pum chhuak a ni tlat. Sexy tiha a hming rawn lang zui zat thin Mallika Sherawat chuan Jennifer Lynch-i film siam "Hissss" a chang a, hetah hian saruakin a lang tak tak em tih chu mi tam tak inhnialna a ni.
Hissss film-ah hian tualthahna leh thisen chhuak a lang nasa hle a, sex pawh a inzep niin an sawi. Mallika hi hmeichhe pakhat, rula chang thei, phuba lak duhna thinlungin a bual at lemah a chang a, trailer-a chirha a tal vel leh rula a inlet lai chu inhnialna chawk chhuaktu tak chu a ni. Thlalatu leh film sawngbawltute an thiam a, hmanrua a tha a, a changtuin a thiam hle bawk; hei vang hian han en mai chuan thawmhnaw inbel lo pawh a ang hle reng a ni. Mallika hian a taksa rem zaih mai thawmhnaw a inbel a, a ngho pawh hi an siam ang khawp mai. A sexy ber lai chu nupa khawsa lai, Irrfan Khan leh Divya Dutta-te chan a ni zawk. Eng pawh nise, Indian Censor Board chuan ‘Adults Only’ an ti tho thovin a rinawm.

Thalai pual :
Thlawhna Chhungah Drugs Rui
A hun laia rocker lar leh che thing ve thei tak Pete Doherty chu, June ni 6 khan thlawhtheihna chhunga drugs a ruih avangin Switzerland-ah an man. Kate Moss-i ‘ex’ hian life performance nei turin Geneva hi a pan a, an tum hma lawkin British Airways cabin staff-te chuan toilet atanga la chhuakin a thutna ngaiah an thuttir leha, pilot chuan police hriattirin anni hian an lo rek nghal chat a ni.
He thlawhnaa chuang ve pakhatin Sunday Mail (UK) a hrilh dan chuan, "He thlawhnaa chuang ve mi thenkhat pawhin kawng chanve vel an thlawh laia Pete-an toilet a pan lai chu an lo hmu ve a, thlawhtheihna tum hma minute 25-a hriattirna an puan hnuah pawh a la rawn chhuah tak loh fo avangin thlawhna hnathawkte chuan an va la chhuak ta a ni. Pete-a hian kawngka a rawn hawn (duh/theih?) loh avangin minute 10 zet chu kawngkaa luh tum hian an bei a, a tawpah Pete-a chu an rawn kuah chhuakin a hriau hman pawh an rawn la chhuak nghal bawk." Dan kalha a chet avangin Pete-a hi sum chawitir a ni a, ruahmanna kal fel vek tawh a show neih tur erawh chu thuneitu lamin an phalsak ta hram a ni.

Thalai pual :
Miss Bollywood IPL
May ni 24 zan khan Johannesburg-a Wanderers stadium-ah 2009 IPL Season kharna neih a ni a, Deccan Chargers-ten trophy an chawi rual hian East London chhas Dune Kossatz chu Miss Bollywood IPL South Africa atan thlan a ni. Kum 35 mi Dune Kossatz hi film chan lamah pawh hnuhma lo nei ve nual tawh a ni a, stadium hrang hrang atanga nula hmeltha zual thlan chhuah 48 zinga vote hmu hnem ber a ni ta a ni. Internet atanga mipui vote laknaah hian kum 24 mi, Johannesburg atanga Business Marketing zir chhuak Genna Cloud chu pahnihna a ni a, pathumna chu Dunay Nortje a ni ve thung. Miss IPL atana thlan a nih tak av^ng hian Dune Kussatz chuan Bollywood luhchilh theihna hun remch^ng a nei d^wn a, screen test a paltlang thei a nih chuan Shah Rukh Khan nen an ch^ng dun nghal ang. IPL Miss thlan a nih tur chungchang hi kan rawn tar lang tawh a, tlai deuh tawh mahse a result kan rawn thai lang leh hram a ni e.

Thalai pual :
Pian Nalh Lo Pathum
Lar hi hmel thatna a ni kher lo ang bawkin mi hlawhtling nih hi pian nalh tihna pawh a ni chuang lo. A lar leh hlawhtling apiang hi a hmel tha tha leh a pian nalh ber ber chu ni dawn ta se heng mi pathumte hi a duhawm pawl chu an ni ngei ang le. Mahse, contactmusic.com in British mipa 1,500 ngaihdan a lak khawmah chuan Victoria Beckham hi itawm lo number one a ni tlat! Hmeichhe lar ve si, pian nalh lo leh itawm lo ber dawttu chu super model lar Kate Moss a ni a, pathumna chu Lily Allen a ni ve thung. An thlalak hi han en vang vang la, i iai deuh nge i la hmu spak viau tho?

Thalai pual :
Mipate hian hmeichhiate an tehna langsar ber pawlah chuan, an itawm leh itawm loh hi a ni awm e. Chutiang bawkin, hmeichhiate pawh hian mipa laka itawm leh nalh nih hi an tum niin a lang.
Tunhnaia FHM magazine-in Hmeichhe itawm 100 an thlannah chuan, Megan fox chuan a pakhatna a hauh leh ta nalh mai. Jenifer Lopez tih lohah chuan, Fox-i hi hetianga a zawna hmeichhe itawm ber nihna hauhtu a ni. Hun rei tak thawm nei lo leh tla chhe tawh hnua ngaih, Britney Spears pawh 12-naah a rawn lang ve ta nawlh mai.
Megan Fox hi May ni 16, 1986 khan Oak Ridge, Tennessee-ah a lo piang a. Fox hian u hmei chhia pakhat neiin, naupangte an nih laiin a nu leh pa hi an inthen a, a u nen hian a nu leh a pahrawnin an enkawl lian a. Hetianga an seilenna kawnga leh enkawlnaah hian inthununna leh khuahkhrihna hnuaiah an seilian a ni. Kum 5 a nih atangin lam lam leh lemchan khawvel hi a zir tan tawh a ni.
Kum 16 a nihin lemchan khawvelah lut tanin a nun a hmang tan a. Hemi hnu hian film leh TV serial hrang hrang hrang changin a lo lar chhova, Public magazine hrang hrangah pawh Magazine Cover-ah sulhnu a hnutchhiah ve ta nual a ni.
Fox-i hi Angelina Jolie nen pawh tehkhin a ni thin a. Angelina Clone, Angelina 2.0 leh Angelina Junior ti tein a hming an vuah bawk thin.
Fox-i hian Tattoo hi a lawm ve hle a ni mai thei, hriat theih chinah, a taksa bung hrang hrangah hian Tattoo pariat lai a nei a. Heng a tattoo zinga langsar tak chu, a bân ding hmalama Marilyn Monroe lem hi a ni. Hetianga Monroe-i lem a tarlan chhan a sawi dan chuan, "Ka piana hnu lama zailam ka hmuh hmasak ber a ni a, a han zaia, a aw a han tikikawi vel ka hriat te hian ka tap lo chauh a ni ber mai," a ti a, Monroe-i hi a ngaisang ve nangiang a ni ngei ang.
Hetianga hmeichhe duhawm/itawm thlangtu chanchinbu hi mipa lam chhiar chi chanchinbu a ni a. Kan sawi tawh angin, Fox-i hi a tet laia inenkawlnaah khauh tak leh khirh tak enkawl a nih ang, a mah pawh hi a invawng tha em em a. Hemi vang pawh hian mipa lam hian han chhai enah an en vak thin lo niin a sawi.
Han ngaihtuah mai chuan, hetianga hmeichhe duhawm leh itawm; mahse, han chhai mai tura ngamawm bawk si loh, rilru taka lo star bawk si chuan rilru pawh a tihah ve duh thin ngawt ang. Mahse mipa chu mipa nge nge tih ang deuhvin, tu emaw chuan Fox-i hi an la chhaitlu ve em ang chu maw?

Thalai pual :
MIA
Mizo a ni lo va, Mizo hming dik tak a pu hauh lo bawk. Sri Lanka Tamil chhungkaw thlah kal zel, British mi leh sa nihna nei Mathangi "Maya" Arulpra-gasam hi July ni 18, 1975 khan Hounslow, London-ah a rawn piang a, a naupan lai atanga LTTE lam tuipui, Tamil Eelam zalenna atchilh bur mai a ni. Mathangi hi a naupan lai pawhin Eelam Revolutionry Organisation of Students (EROS) din chhuaktute zinga tel ve ngat a ni nghe nghe. Zaithiam a ni satliah mai lo va, hla phuah thiam, lemchan thiam, fashion designer leh record producer a ni bawk. A hming M.I.A. tih hian awmze pahnih a nei a, chungte chu ‘Missing in Acton’ tih leh "Missing in Action’ tihna an ni.
LTTE Chhungkua!
Thla ruk mi chauh a nih lai hian an chhungkua chu Sri Lanka lamah an kir leh a, Tamil buaina lo hluar chho zelah a pa pawhin politics a luhchilh ve ta a. Kum riat mi a nih hian buaina avanga thiar sawn zingah an tel ve a, a pa Arul Pragasam hi Sri Lanka Army laka tlanchhe reng a nih avangin an inbe khat hle. 1980 khan a nu Kala hovin London-ah bawk an kir leh a, hemi tum hi chuan raltlan dik tak an ni ta.
Kala hian a fate pathum chu a theih ang tawk tawkin a enkawl chho va, Arulpra-gasam hlawhtlinna kawng han chhut hian harsatna karah amah lo enkawl tang tangtu a nu hi fak loh theih a ni lo. Arulpragasam hian Saint Martins College of Art and Design atangin graduation a zo va, tunah chuan eizawnna kawng nga zetah mi hriat a lo hlawh ta reng mai. The Exit band-a an zaitupa leh guitarist Benjamin Brewer nen inhualin kumin kum tir lam (Feb 11) khan fapa Ikhyd Edgar Arular Bronfman an nei nghe nghe. An chhungkua hian Bedford-Stuyvesant, Brooklyn, New York-ah an cheng mek a ni.
Mi Hlawhtling Mathangi
Tam tak chuan Arulpra-gasam aka M.I.A. hi zaithiam hriatin kan hre awm e. Music industry hi a lian em a, a awm viau tho mai. Mathangi Arulpragasam hian kum 2001 khan Portobello Road, London-a Euphoria dawr lianah painting exibition a lo nei daih tawh tih i hria em le? Film lamah pawh a thawnthu ziaktu ber a ni ve fo va, John Singleton te pawhin a sawma an sawm a nih avangin te vak lo turah i ngai phawt teh ang. 2008 khan a fashion design hrang hrangte chu mipui hmuh theih tura pho chhuah a ni a, September thlaa fashion-week Opening Ceremony dawr hrang hrangah a design "Okley Run," "People Vs Money Tour Tees" leh "KALA Tour Tees" te chu hralh chhuah an ni. Hei mai a la ni lo, Mathangi Arulpragasam hi N.E.E.T. record label dintu a la ni cheu!
Rimawi khawvela a intah luh dan hi chu thil intawng fuh palh ang deuh pawhin a ngaih theih. Elastica band member pakhat Justine Frischmann nen album cover chung-changah an inhmelhriat a, anni hian America ram chhunga state 40 zeta tour an neihnaah an hruai ve nghe nghe. Hetianga an zin kualnaah hian electroclash artist Peaches chuan Arulpragasam chu Roland MC-505 sequencing drum machine tangkaizia te hrilhin rimawi lam chu tichhin ve turin a fuih a, London-a a kir leh veleh Arulpragasam hian hla paruk a siam ve ta a ni. Hemi tuma a hla siamte zinga lar deuh deuhte chu "Lady Killa," "M.I.A." leh "Galang" te an ni.
Beisei phak bakin he "Galang" hi a rawn lar chho va, M.I.A. chuan XL Recordings-ah contract a ziak ta mai a. A single hmasa ber "Galang" hi 2004 khan tihchhuah a ni a, a pahnihna "Sunshowers" pawh 2004 kum tho, July ni 5 khan tihchhuah a ni bawk. Kum 2005 March thlaa a album hmasa ber "Arular" tihchhuah a han nih meuh chuan khawvel a nghawng a, inhnialna nasa tak a chawk chhuak ta a nih kha. Hei hi a chhan ber chu a album-a Arulpragasam-i background hmuh tur a tam em vang a ni. "Amazon," "Fir Fire," leh "M.I.A." ahte chuan retheihna hlimthla te, revolution leh tharum thawhna lampang a inzep tun a, PLO leh Tamil mite zalenna sual chung-chang a kawk tlang rawng bawk.
Eng pawh nise, Arular chuan Arulpragasam chu khawvel hriatah a rawn siam lian ta reng reng a, 2005 kum chu atan buai kum a ni ringawt mai. A album vawrh lar turin show hrang hrang a neih a lo ngai a, Coachella Valley Music and Arts Festival, Bue Festival, Central Park Summerstage leh Summer Sonic Fest tih velah te chuan a zai mawlh mawlh tawh mai a ni. Hemi kum vek hian Missy Elliott ho album thar "The Cookbook" a an hla pakhat "Bad Man" track-ah a lang nghe nghe.
Arular hi Mercury Music Prize 2005 short list a ni a, Year-End Top 10 list for 2005 zingah thlan a niin ‘second most featured album’ ah critics lam chuan an thlang a ni. Arular-ah hian mipui duh dan a tla rual lo hle tih a hriatna chu, thekhatin duh lo viau mahse publication thenkhat - Blender, Stylus leh Musik-byran te chuan kum 2005 chhunga album tha berah an thlang ve tlat lawi si. Buaipui tham chu a ni e.
Kala Girl
2006 atang khan a album pahnihna, a nu hming chawia "Kala" ti a vuah chu a buaipui chho tan a, 2007 August thla khan released in Rolling Stone leh Blender magazine te chuan Album of the Year atan an thlang nghe nghe. Kala a buaipui chhung pawh hian M.I.A. hi a zin kual reng a, India, Trinidad, Liberia, Jamaica, Australia, Japan, UK leh US te chu a kar tawn sek reng a ni. A music video "Hit That" leh "Bird Flu" te chu internet atanga download theih tura ruahman an ni a, a hma ang bawk khan a album tihlar tuma show neih a ngai reng bawk. Tour a neihpui pakhat Egyptian Lover chuan M.I.A. in album pathumna a siam turah a thawhpui dawn tih a sawi a, hei vang hian album dang pawh a hla tawh vak lo niin a lang.
A tir lama kan sawi tak ang khan M.I.A. aka Arulpra-gasam-i nun leh music hi politics nen a inchiahpiah thui hle a, a hla lar "Bird Flu" video-ah pawh LTTE logo niawm tak hmaah naupang ho an lam dual dual a nih kha. Sri Lanka sawrkarin LTTE laka beihpui a thlak pawh kha Tamil mite suatna ang hialin a lo chhuah tawh a, a chungchangah hian sawrkar pawh tawng chhuakin Sri Lanka Foreign Secretary Dr Palitha Kohona chuan, "Thu dik lo an hrilh niin ka hria. Ama thatna lam kawnga a kal mai hi kei chuan tha ka tihpui a, a thiamna ber chu politics ni lovin music a ni," a lo ti fak fak tawh a ni.
2009 January ni 28 khan PBS television host Tavis Smiley chuan interview a neihpui a, a lo tel tawhna thin Tamil zalenna sualtute leh LTTE tharum thawh a thlawp dan chungchanga zawhna erawh chhan harsa a ti hle. Arulpragasam chuan, "Tamil tih in ngaihtuah chhuah hian in rilru-ah chuan Tamil Tiger a rawn lang nghal a, hei hi a ni ber lo. Tamil tih chu Tamil hnam, mipui nawlpui, pawikhawih ve lote zawng zawng huama sawina a ni," a ti. Sri Lanka sawrkar sipaite tharum thawhna leh LTTE lamin kha leh chen tharum hmanga an lo beih tawhna te kha a thlawp lo tih sawi mahse he Tamil nu thisenah hian LTTE zungzam a la bei nghet hle tih a lang. Sri Lanka sawrkarin LTTE te a tukdawl tak hnu hian eng rilru nge a put zui zel dawn tih hriat a chakawm hle.
M.I.A. Biograpphy
Hming: Mathangi Arulpra-gasam
Pianni: July 14, 1975
Pianna hmun: Hounslow, London
Address: Bedford-Stuy-vesant, Brooklyn
Instrument: Vocals, percussion
Label: XL, Interscope, Showbiz

Thalai pual : Metro Station
2008 kum laihawl khan Los Angeles lam chhuak, pop band lar lem lo tak pakhat chuan single "Shake It" an rawn tichhuak ve tlang tlang a, rin loh takin US chart pathum ngawtah top 10 a rawn hauh ta mai; hei hi rimawi khawvelin Metro Station a hriat ‘Tak Takna’ chu a ni. Shake It hian Billboard Hot 100-ah #10 a hauh nghal a, Hot Digital Songs #3, Pop 100 #9 leh Hot Dance Airplay chart-ah #20 dinhmun a luah bawk. Tin, he hla vek hi Australia khaw-mualpuiah pawh an hlawh-tlinpui a, Australian Kids Choice Awards 2008-ah khan ‘Favourite Song’ award dawng tura thlan a ni nghe nghe.
Tun lai band chhuak thar tam tak hian hming neih mak sak hi intihlarna hmanraw pakhatah hmangin an intihhmuh hle a, Metro Station pawh hi chu huangah chuan ngampa takin kan khung thei ang. Kum 2006 khan Trace Cyrus-a nu leh Mason Musso-a nu hi Hannah Montana film chungchangah inhmuin an inhmelhriat chho va (Trace-a farnu Miley Cyrus leh Mason-a unaupa Mitchel Musso-te hi Hannah Montana film-ah khan an chang a ni), chumi azarah chuan Trace leh Mason hian rimawi lama an tuina te sawi dunin band din an titlu ta a. A hmasa ber atan Trace chuan tualchhung band pakhat Synthetic Joy atangin Blake Healy chu a la lut a, an pathum hian an bei ho ta tlang tlang a ni.
Band anga an han din takah chuan drummer laktlak ve zet mai Anthony Improgo chuan a rawn ngaihven ta riau a, ani hi MySpace Music website-a an hla "Seventeen Forever" an release hnu lawk khan an lalut ta nghe nghe a ni. Ti chuan, an han bei tauh tauh va, MySpace Music-ah chuan an hlawhtling chho viau a, MySpace Music Unsigned Band chart-ah na na na chuan ro an rel ve viau zel. Beidawng lo va bei ta fam chuan hlawhtlin hun an nei a, Columbia Records chuan Walking Eye programme kal tlangin an rawn chhar chhuak ta nawlh mai le. Khawvel pum huap pawha recording lar leh ropui, rimawi khawvela mi ropui tak takte lo vawrh chhuak tawhtu Columbia Records-ah ngei chuan an inziak lut ve ta rup mai a ni.
2007 July thla khan music magazine pakhat Alternative Press chuan "22 Best Underground Bands" a thlang a, Metro Station chu hmaih rual a ni lo. Hemi kum vek, September thla hian an band hming chawiin album hmasa ber an tichhuak a, an single pahnih - "Kelsey" leh "Control" te chu hlawhchham chiang viau mahse he album hlawhtlinna zar zo hian hla lar tak an ni zui ta tho a ni. Chutah, 2008 kum laihawl khan "Shake It" an rawn tichhuak leh zauh va, an tihfuh zia chu kan hriat tawh kha.
Metro Station hi mahni ngata tour la nei tur chuan a la naupang deuh va; mahse, tour an neihpui ngat chin chu an theuneu bik lo hle. Panic at the Disco, We The Kings, Boys Like Girls, Valencia, Cobra Starship, The Veronicas leh Good Charlotte te pawhin tour an lo neihpui tawh a, underground band ti chuan an sawi rei tawh hauh lo vang le. Metro Station band member-te chu:
Mason Musso - lead vocals, rhythm guitar
Trace Cyrus - vocals, lead guitar
Blake Healy - bass guitar, synthesizers, keyboards
Anthony Improgo - drums, percussion